LANTEGI BATUAK-EK BERE GAITASUN INDUSTRIALA ETA LOGISTIKOA INDARTU DITU IURRETAKO ZENTRO BERRIAREKIN, BERE SAREKO 21.a

Lantegi Batuak-ek Anboto bere zentro berria aurkeztu du gaur Iurretan, eta ekitaldian izan dira Bizkaiko Foru Aldundiko Ekonomia Sustapeneko diputatu Ainara Basurko eta Iurretako alkate Oskar Koka. Gizarte ekonomiako erakundeak Bizkaian duen hogeita batgarren zentroa da, eta bertan 30 pertsonak egiten dute lan, horietatik 25ek desgaitasuna dute.

Anbotok 1,2 milioi euroko inbertsioa suposatu du, eta 5.000 metro koadroko azalera du. Horien erdia metal eraldaketako zerbitzuetarako da, eta azken belaunaldiko teknologiak erabiltzen ditu, hala nola ur zorrotada bidezko mozketa eta laser bidezkoa.

Horiek osatzeko, toleste, txertatze, eragiketa osagarri eta logistika teknologiak erabiltzen dira. Teknologia horiei esker, Lantegi Batuak-ek zerbitzu integrala eskaintzen die bere bezeroei, batez ere sektore elektrikokoei, esate baterako Power Electronics, Grupo Velatia, Ingeteam Power Technlogy edo Pronutec, besteak beste.

Beste erdia logistikarako da, eta, Iurretan bertan dagoen Lantegi Batuak-en beste zentro batekin batera, 7.500 metro koadroko hub bat osatzen du. 50.000 erreferentzia eta 13.000 kokapen biltegiratzeko ahalmena du, eta egunean 2.000 eskaera lerro kudeatzeko ahalmena dauka.

Jarduera logistikoari emandako bultzadari esker, goialdean biltegiratzeko ahalmena handitzeaz gain, lekua irabazi da lurzoruan, manipulazio logistikoak egiteko edo lurzoruan biltegiratzeko. Logistikarako instalazioa, gainera, bateriak biltegiratzeko berariazko espazio batekin osatu da.

Logistikako soluzioekin Lantegi Batuak-ek, ekipamendu elektrikoaren sektoreko aipatutako enpresa horiez gain, Orbea, Aurubis Berango, KW Damping Technology SA eta Arte Ederren Museoari ematen die zerbitzua, besteak beste.

2024. urteko balantzea

Lantegi Batuak-ek 21 industria zentro ditu Bizkaian -eskualde guztietan- eta, bere dibertsifikazioaren ondorioz, zerbitzu sare zabala eskaintzen du (lorezaintza, garbiketa, dokumentuen kudeaketa, vending-a, mendekotasunaren laguntza). Horietan, desgaitasuna duten 2.600 pertsonak egiten dute lan.

2024an, erakundeak 49 lan aukera berri sortu zituen desgaitasuna duten pertsonentzat, horietatik 20 bere zentro eta zerbitzu sarean, eta 29 enpresa arruntetan. Gaur egun, adimen desgaitasuna duten 147 pertsona ari dira lanean Bizkaiko hainbat sektoretako enpresetan, Lantegi Batuak erakundearen laguntzapeko enplegu programari esker.

Negozio zifra 97,8 milioi eurokoa izan zen, eta 3 milioi euroko inbertsioak egin ziren.

Bestalde, 2024an sortutako Balio Sozial Integratua 262 milioi eurokoa izan zen. Balio horrek islatzen du erakundeak zer eragin duen berarekin elkarrekintzan aritzen diren interes taldeetan, hala nola desgaitasunen bat duten pertsonengan eta haien familietan, administrazio publikoetan, bezero eta hornitzaileetan, etab.

Lantegi Batuak-ek 2024-2026 eperako estrategia lau erronka nagusitan oinarritzen du: interes taldeei sortutako balio soziala handitzea, pertsonen garapena, hazkundea eta jasangarritasuna, eta garapen teknologikoa.